გაგუას კლინიკა

როგორი იქნება თქვენი მშობიარობა, წინასწარ ვერავინ გეტყვით, რადგან ყველა მშობიარობა განსხვავებულია. ზოგ შემთხვევაში, იგი რამდენიმე საათში მთავრდება, ხანდახან კი, ნამდვილ გამოცდად გადაიქცევა. იმისათვის, რომ იცოდეთ რა მოგელით, საჭიროა გაეცნოთ მშობიარობის ეტაპებს. ფიზიოლოგიური (ვაგინალური) მშობიარობა სამი პერიოდისაგან შედგება. პირველი პერიოდი, მოიცავს წინა სამშობიარო პერიოდს (ლატენტურ ფაზას) და აქტიურ მშობიარობას. მეორე პერიოდი, იწყება  ჭინთვების დაწყებისას. სწორედ ამ დროს ხდება ნაყოფის დაბადება. მესამე პერიოდში პლაცენტა და სანაყოფე გარსები გამოძევდება.

წინა სამშობიარო ტკივილები - მშობიარობის ლატენტური ფაზა

მშობიარობის ლატენტურ ფაზაში საშვილოსნოს ყელი იწყებს გათხელებას და გადასწორებას. ამ პერიოდში შესაძლოა იგრძნოთ არარეგულარული და შედარბით დაბალი ინტესნივობის ტკივილი. ყელის გახსნას, თან ახლავს ვარდისფერი, ბლანტი გამონადენი.  ამ პროცესს „საცობის მოხსნა“- ეწოდება, ეს ნორმალურია და აღელვების მიზეზს არ წარმოადგენს. ადრეული სამშობიარო ტკივილები შესაძლოა რამდენიმე საათიდან რამდენიმე დღემდე გაგრძელდეს. თუმცა, შემდგომი მშობიარობებისას, მისი ხანგრძლივობა იკლებს. სასურველია ამ პერიოდში სიმშვიდე შეინარჩუნოთ, დაელოდოთ რეგულარული ტკივლიების დაწყებას და შემდეგ მიმართოთ კლინიკას. იმ შემთხვევაში, თუ დაღვარეთ სანაყოფე სითხე ან გაქვთ ჭარბი სისხლიანი გამონადენი, სასწრაფოდ მიმართეთ კლინიკას.

აქტიური მშობიარობა

აქტიური მშობიარობისას საშვილოსნოს ყელი 6 სანტიმეტრიდან 10 სანტიმეტრამდე იხსნება. ტკივილის ინტესნივობა თანდათანობით იზრდება და ხშირდება. იღებს რეგულარულ სახეს. მოსალოდნელია გულისრევის შეგრძნება, ღებინება და კუნთების სპაზმი. დიდია ალბათობა სანაყოფე სითხის დაღვრის. ამ დროს უკვე აუცილებლად უნდა მიმართოთ კლინიკას. ტკივილიის ინტენსივობის ზრდასთან ერთად, შეგიძლიათ თქვენს ექიმთან კონსულტირებით, მიიღოთ გადაწყვეტილება ანესთეზიის (გაუტკივარების) შესახებ. გსურთ თუ არა გაუტკივარება, მხოლოდ თქვენი გადასაწყვეტია. აქტიური მშობიარობა საშუალოდ რვა საათი გრძელდება.

აქტიური მშობიარობისას, პოზა შეზღუდული არ არის. უმჯობესია იყოთ აქტიური და მობილური. შეგიძლიათ გამოიყენოთ სამშობიარო ბურთი. მნიშვნელოვანია სუნთქვის ტექნიკა. შეტევისას, ცხვირით ჩასუნთქვა და პირით ამოსუნთქვა, დაგეხმარებათ ტკივილის დაძლევაში. შესაძლოა შეტევებს შორის, წელის მიდამოში, მსუბუქმა მასაჟმა შეგიქმნათ კომფორტი.

აქტიური მშობიარობის ბოლო, გარდამავალი პერიოდი, განსაკუთრებით რთულია. ამ დროს ტკივილები ხშირდება და 60-90 წამი შეიძლება გაგრძელდეს.  გექნებათ ზეწოლის შეგრძნება სწორ ნაწლავზე და მოგინდებათ გაჭინთვა. თუ სრული გახსნა არ არის, ექიმი გეტყვით, რომ უნდა მოითმინოთ. ამ დროს გაჭინთვამ შეიძლება გამოიწვიოს საშვილოსნოს ყელის ტრავმირება. გარდამავალი პერიოდი 15 წუთიდან ერთ საათამდე შეიძლება გაგრძელდეს.

მეორე პერიოდი

მეორე პერიოდში იბადება ბავშვი. ამ დროს დედის ყველაზე დიდი მისიაა გაიჭინთოს. ჭინთვის შეგრძნება განსხვავდება პირველი პერიოდის ტკივილისაგან. თქვენი ექიმი, საჭიროების მიხედვით, გიკარნახებთ როდის უნდა გაიჭინთოთ ან დაელოდება თვითნებურ გაჭინთვას. აუცილებელია გაიჭინთოთ სწორად, ჩააწვეთ შორისის მიდამოს და არ დაჭიმოთ სახის კუნთები. იმისათვის, რომ დავიცვათ შორისი ქსოვილი ჩახევისაგან, ექიმმა შეიძლება გითხრათ, რომ არ გაიჭონთოთ. ამ დროს საშოს ქსოვილი იწელება და ერგება ნაყოფის თავს, შესაბამისად ნაკლებია ჩახევის ალბათობა. ნაყოფის თავის დაბადების შემდეგ, ტანიც მალევე დაიბადება. ახალშობილს შესაძლოა დასჭირდეს სასუნთქი გზების გასუფთავება.

მესამე პერიოდი

ბავშვის დაბადების შემდეგ, თქვენ დიდ შვებას იგრძნობთ და მთელი ყურადღება ახალშობილისკენ გადავა. თუმცა, ამით ყველაფერი არ დამთავრებულა. საჭიროა პლაცენტისა და სანაყოფე გარსების გამოძევება. ამ დროს, თქვენ გაგიკეთებენ ინექციას, რათა უზრუნველყონ საშვილოსნოს შეკუმშვა და ჭიპლარის ტრაქციით (დაქაჩვით), პლაცენტა გამოძევდება. ექიმი დაათვალიერებს გარსებს და პლაცენტას. შორისზე და საშოს რეგიონში ლაცერაციების (ჭრილობების) არსებობის შემთხვევაში, მოხდება მისი მთლიანობის აღდგენა. იმ შემთხვევაში, თუ გაუტკივარება არ გაქვთ გაკეთებული, ჭრილობა გაიკერება ლოკალური ანესთეზიის ქვეშ.

მშობიარობის შემდგომ ორ საათს, გაატარებთ სამშობიარო ბლოკში, სადაც პერიოდულად მოხდება საშვილოსნოს კონტროლი მუცლის წინა კედლის მასაჟით. ორი საათის შემდეგ, ახალშობილთან ერთად, მელოგინეთა განყოფილებაში გადახვალთ. სადაც მშობიარობიდან 48 საათს გაატარებთ.